ШЫМКЕНТ: ӘЛ-ФАРАБИ АЛАҢЫ МЕН АРБАТТА ДЕЗИНФЕКЦИЯ ЖАСАЛДЫ
ШЫМКЕНТ: ӘЛ-ФАРАБИ АЛАҢЫ МЕН АРБАТТА ДЕЗИНФЕКЦИЯ ЖАСАЛДЫ
Елімізде жарияланған төтенше жағдайға байланысты Шымкент қаласындағы бірқатар нысандарда дезинфекциялау жұмыстары жүргізілді. Атап айтқанда, Әл-Фараби алаңы, Орыс драма театрының маңайы және Арбат демалыс аймағында сақтық шаралары күшейтілді.
Жалпы, қалада медицина мамандары коронавирустың алдын алу мақсатында күшейтілген жұмыс режимде жұмыс істеуде. Дәрігерлер қаладағы ХҚКО-ның 11 бөлімшесінде кезекшілікке түсіп, орталыққа келген азаматтарға медициналық көмек көрсетуде. Мұнда санитарлық-эпидемиологиялық талаптар қызмет талабына сай жүргізілуде.
Шаһардағы басқа да профилактикалық шаралар қатаңдатылған. Бүгін Шымкент қаласына кіретін-шығатын автожолдарда 12 санитарлық бекет қойылды.
Қазіргі таңда Шымкенттегі полиция мен медицина қызметкерлері күшейтілген режимге көшті. Мамандар әр көлікті тоқтатып, арнайы құрылғымен азаматтардың дене қызуын өлшеп, тексеруде.
Ал Нұр-Сұлтан және Алматы қаласынан Шымкентке келген тұрғындарды дәрігерлер емханаға уақытша тіркеуге шақыруда.
https://shymkent.gov.kz/kz/news/2074