Қазақстан Республикасы Президенті Әкімшілігінің келісімімен, Қазығұрт ауданының әкімі лауазымына ұсынылған Арман Айдарұлы Абдуллаевтың кандидатурасын аудандық мәслихат депутаттары бірауыздан қолдау білдірді. Жаңа әкімді аудан активіне Түркістан облысының әкімі Өмірзақ Шөкеев таныстырып, алдағы мақсат — міндеттерін айқындап берді.

Қазығұрт ауданындағы халықтың әлеуметтік-экономикалық әл-ауқатын көтерудегі Елбасы Н.Назарбаев саясатын жүзеге асырып, Мемлекет басшысы бекіткен тапсырмаларды сапалы орындауды жүктеді. Аймақ басшысы төрт жылдан аса уақыт Қазығұрт ауданын басқарып, өңір дамуына өз үлесін қосқан Төлеген Телғараевқа алғыс білдіріп, алдағы қызметіне сәттілік тіледі.

«Қазығұрт ауданын басқарып келген Төлеген Телғараевтың басқа қызметке ауысуы заң аясында, ротация тәртібімен жүзеге асып отыр. Аудан әкіміне жүктелер міндет көп. Осы жауапты қызметке тәжірибесі мол, еңбекқор басшы келді. Қазығұрт — күре жолда тұрған, шекаралас, стратегиялық маңызы бар аудан. Ауыл шаруашылығын одан әрі дамытып, кәсіпкерлікті өркендетуге күш салу керек. Индустриалды аймаққа
инвестиция тартып, инфрақұрылымды одан әрі дамытып, аудан тұрғындарын жұмыспен қамту маңызды. Ең бастысы, ел бірлігін сақтап, елдің әл-ауқатын көтеруге аянбай жұмыс істеуіңіз қажет. Ал, ол үшін осындағы ел ағалары, ақсақалдар әкімге қолдау көрсетіп, ынтымақты жоғары орынға қойғаны абзал», — деді Өмірзақ Шөкеев.

Өз кезегінде Арман Абдуллаев аймақ басшысына сенім білдіргені үшін алғысын жеткізіп, алдағы уақытта Қазығұрт ауданының дамуы мен өркендеуі жолында бар күш-жігерін жұмсайтынына сендірді.

Айта кетейік, Арман Айдарұлы 1977 жылы Оңтүстік Қазақстан облысы Қазығұрт ауданы Жаңабазар ауылында туған. Білімі жоғары, мамандығы — инженер-экономист.

Мемлекеттік қызметті 2003 жылы Оңтүстік Қазақстан облысының экономика департаментінің жиынтық талдау бөлімінің бас маманы лауазымында бастаған. 2007-2013 жылдары Оңтүстік Қазақстан облысының кәсіпкерлік және өнеркәсіп департаментінің кәсіпкерлік және инновациялық қызмет бөлімінің бастығы, Оңтүстік Қазақстан облысының экономика және бюджеттік жоспарлау басқармасының бюджеттік саясат және жоспарлау бөлімінің бастығы, инвестициялық саясат бөлімінің бастығы, басқарма басшысының орынбасары лауазымдарын атқарған.

2013 — 2018 жылдар аралығында Оңтүстік Қазақстан облысы Экономика және бюджеттік жоспарлау басқармасының басшысы, Оңтүстік Қазақстан облысы Шардара ауданының әкімі, облыс әкімі аппараты экономика және бюджеттік сала мониторингі бөлімінің басшысы, Түркістан облысы әкімі аппараты басшысының орынбасары – ұйымдастыру-инспекторлық жұмыс және аумақтық даму бөлімінің басшысы қызметтерін атқарды. 2019 жылдан бері Түркістан облыстық стратегия және экономикалық даму басқармасының басшысы қызметін атқарып келді.