Өскемен қаласында құдық ішінен ер адамның мәйіті табылды, деп хабарлады ҚазАқпарат тілшісі.

ШҚО полиция департаменті баспасөз қызметінің мәліметіне сүйенсек, «102» жедел арнасына белгісіз ер адамның денесі табылғаны туралы хабар түскен.

«Полиция қызметкерлері бірден оқиға орнына келіп жетті. Мәйіт Назарбаев даңғылы бойында «Адем» аялдамасы маңындағы коммуналдық құдықтардың бірінен табылған. Қазіргі уақытта марқұмның кім екені анықталып жатыр. Әзірге оның нақты неден өлгені белгісіз. Сараптама жұмыстары тағайындалған», — делінген ақпаратта.

Тәртіп сақшылары аталған факті бойынша сотқа дейінгі тергеу амалдарын жүргізіп жатыр.

Өзге ақпарат ҚР Қылмыстық іс жүргізу кодексінің 201-бабына сәйкес жария етілуге жатпайды.

Еске салсақ, осыған дейін Өскеменде Үлбі өзенінің жағасынан жас жігіттің мәйіті табылғаны хабарланған.