Қаржы министрі Ерұлан Жамаубаев республикалық бюджет ақшасын игере алмай жатқан министрліктер мен әкімдіктерді атады, деп хабарлайды Sputnik Қазақстан тілшісі.

Айтуынша, мемлекеттік бюджеттің шығыстары 97,5%-ке, республикалық бюджеттің шығыстары – 99,4%-ке, жергілікті бюджеттердің шығыстары 95,8%-ке атқарылды.

«Республикалық бюджет бойынша шығыстар 13 триллион теңгені құрады. 81 миллиард теңге атқарылмады, оның ішінде 15 миллиард теңге үнемделген. Игерілмегені –  66 миллиард теңге», — деді Жамаубаев үкімет отырысында.

Неғұрлым ірі соманы игермеген ведомстволар – мәдениет және спорт, цифрлық даму, инновациялар және аэроғарыш өнеркәсібі, индустрия және инфрақұрылымдық даму, ауыл шаруашылығы және ішкi iстер министрліктері.

Игерілмеудің негізгі себептері: нақты көрсетілген қызметтер көлемі үшін ақы төлеу; орындалған жұмыс актілерін, шот-фактураларды уақтылы ұсынбау; конкурстық рәсімдерді ұзақ өткізу; қаржыландыру жоспарына өзгерістер енгізу қажеттілігі.

Сондай-ақ министрдің айтуынша, жергілікті бюджеттердің шығыстары 8 триллион теңгені құрады. 327 миллиард теңге атқарылмаған.

Биыл өңірлерге 2,5 триллион теңге нысаналы трансферт көзделген. 1 қарашадағы жағдай бойынша оларға 2 триллион 157 миллиард теңге бөлінді. Оның 94,2%-і игерілді.

«Атқарылмағаны – 124 миллиард теңге, оның ішінде үнемделгені – 21 миллиард теңге», — деді ведомство басшысы.

Қаржыны ең көп игермеген әкімдіктер – Нұр-Сұлтан қаласы, Алматы, Батыс Қазақстан, Түркістан облыстары және Алматы қаласы.