ТҮРКІСТАНДА ӘЛЕМДЕ ТЕҢДЕСІ ЖОҚ ТУРИСТІК КЕШЕННІҢ ҚАЗЫҒЫ ҚАҒЫЛДЫ

ТҮРКІСТАНДА ӘЛЕМДЕ ТЕҢДЕСІ ЖОҚ ТУРИСТІК КЕШЕННІҢ ҚАЗЫҒЫ ҚАҒЫЛДЫ

Түркістан облысына іс-сапармен келген ҚР Премьер-Министрі Асқар Мамин облыс орталығында салынып жатқан бірқатар құрылыс нысандарын аралады.

Үкімет басшысы Түркістан облысының әкімі Өмірзақ Шөкеевпен бірге мемлекеттік-жекешелік әріптестік аясында «Sembol construction» түрік компаниясы қолға алған «Керуен-сарай» көпфункционалды туристік кешен құрылысын іске қосты.

Құны 39 млрд теңге тұратын әлемде теңдесі жоқ туристтік кешеннің қазығын қағуға «Sembol Construction» компаниясының президенті Феттах Таминдже арнайы қатысты. Халықаралық деңгейдегі алып кешенде замануаи қонақ үйлер, шығыс базары, мейрамханалар іске қосылып, жасанды көл пайда болады.

Бірегей жобада көне шаһардың көрінісі сақталған, дейді инвесторлар. Құрылыс жұмыстары алдағы жылдың қазан айында аяқталады деп күтілуде. Бұл — қараша айында Стамбул қаласында өткен қазақстан-түрік инвестициялық форумы барысында жүзеге асқан жоба. Сондай-ақ, Түркістан облысына сапары барысында ҚР Премьер-Министрі 630 төсек-орындық көпсалалы аурухананың қазығын қақты.

Жобаны 2022 жылы мемлекеттік-жекешелік әріптестік аясында «YDA Holding» түрік инвесторы жүзеге асыратын болады. Нысанның құны — 100  млрд теңгеге жуық. Жаңа ауруханада 350 дәрігерді қоса алғанда, жалпы 1700-ге жуық медицина қызметкері жұмыс істейтін болады.

Түркістан облысына сапары барысында үкімет басшысы Өмірзақ Шөкеевпен бірге жаңа зауыттың ашылу рәсіміне қатысты. Қазығұрт ауданы Майлыошақ ауылынан салынған зауытта жылдам әзірленетін тамақ өнімдері шығарылады. Әлемдегі аса ірі жылдам әзірленетін кеспе өндіруші — «CG Foods Central Asia» компаниясы жобаға 5,7 млрд теңге инвестиция салды. Жергілікті халықтан 300-ге жуық азаматты жұмыспен қамтамасыз етеді.

Асқар Мамин Түркістан қаласындағы Халықаралық әуежайдың және оған апаратын автомобиль жолының құрылысын, сондай-ақ амфитеатрдың, драма театрының, облыстық ғылыми-әмбебап кітапхананың,  «Ұлы дала Елі» орталығының, Қ.А. Яссауи музейінің, Ұлы Жібек жолы қолөнершілер Ұлттық орталығы ғимараттарының құрылыс алаңдарында болды. Жұмыс сапары аясында ҚР Премьер-Министрі Түркістан қаласын дамыту мәселелері жөнінде кеңес өткізді.

Түркістан облысы әкімінің баспасөз қызметі