«Шымкент аруы-2018» байқауының жеңімпазы белгілі болды
Үшінші мегаполисте мұндай байқаулар өте үлкен дәрежеде өтеді. Ал осы жылы кастингте бақ сынаған көптеген арудың ішінде тек 20 бойжеткен ғана жүзден жүйрік шыққан. Байқау қатысушыларына қойылған талап та оңай болмапты. Нақтырақ айтқанда, сұлулар тек сән көрсетіп қана қоймай, әлеуметтік шараларға да қатысқан деп хабарлайды NUR.KZ.
Бұл додада ең алдымен, бойжеткендердің еңбекке деген құштарлығы тексеріліпті. Одан бөлек, конкурсқа қатысушылар балалар үйіне барып, кішкентай бүлдіршіндермен сөйлескен екен.
«Басты мақсат сол болды. Біз қыздардың тек сыртқы келбетінің сұлулығын ғана емес, жан дүниесін де танытуды жөн көрдік. Біздің арулар осы жоба аясында көп игі іс істеді. Сенбілік те ұйымдастырды, жұртты тазалыққа шақырды. Бізге ешкім ақша төлеген жоқ, сондай-ақ, бізде бикини байқауы да жоқ», -деді «Essen Group» концерт агенттігінің директоры, жоба ұйымдастырушысы.
Конкурс қорытындысы бойынша «Шымкент аруы-2018» Балжан Анас атанған. Оған тәжді «Қазақстан аруы -2018» Альфия Ерсаин табыстады.
Енді Шымкенттің аруы атанған бойжеткен «Қазақстан аруы — 2019» байқауына қатысады.
NUR.KZ тілшісімен сөйлескен жеңімпаз соңына дейін өз жеңісіне күдікпен қарағанын айтты.
«Мен үшін бұл үлкен жетістік. Барлығына рахмет», -деді Шымкент аруы Балжанат Анас.